- عندما بدأ (صف الرغيف) أيام الرئيس المخلوع كنا بنحسب (الناس القدامنا في الصف).
-
يقول ليك : (قدامي أربعة) .
-
أو (قدامي عشرة) .
-
وذات الشيء بالنسبة لصف الوقود وصف (القروش) والصراف الآلي والبنوك .
-
والحمدلله في العهد الجديد انتهى صف القروش بينما حافظ (الرغيف على صفه وكذلك الوقود) .
-
بل، الآن أصبح من الصعب أن (تحسب الناس القدامك في الصف) .
-
الصف بقى أطول من يوم الحزن .
-
بتكون واقف في الصف وما شايف الفرن .
-
واقف في الصف وما شايف الطرمبة .
-
وده طبعاً كلو شغل الكيزان البتحت تحت .
-
عشان كده من الأفضل أن نرجع لكلام أهلنا .
-
أهلنا قالوا (نصف رأيك عند أخوك) .
-
ومن هذا المنطلق .
-
ومن باب المناصحة .
-
وبما أن ذلك كذلك .
-
نقترح للأخوة في الحكومة (توحيد الصفوف) .
-
بدل البلد يكون فيها (صفين) – رغيف ووقود – نوحد الصف ونخليهو صف واحد .
-
جيبوا البنزين بيعوهو في (الفرن) أو شيلوا الفرن ودوهو (الطرمبة) .
-
عشان يبقى صف واحد .
-
توحيد الصف الوطني مهم جداً .
-
هكذا أقترح .
-
وأي زول طبعاً حر في (مقترحاتو) .
-
نرفع شعار:(صفوفنا ليه صفين معاناتنا واحدة وكيف اتقسمت قسمين) .
-
طبعاً مع الاعتذار للشاعر الراحل أبو صلاح صاحب أغنية : (أجسامنا ليه جسمين روحنا واحدة وكيف اتقسمت قسمين) .
-
أبو صلاح، عليه الرحمة، في هذه الأغنية بالذات (قلب كل موازين العقل) وهو ينشد : ( حواسي تحسد نظري في حسنك منتظمين، شمالي تأخده الغيرة إذا جلست يمين، شيء عجيب في غرامك يا فريع ياسمين) .
-
أبو صلاح يثبت في هذه الأغنية أن (حواس الإنسان يمكن أن تحسد بعضها البعض في حالات الحب الكبير) .
-
الحواس تحسد بعضها ناهيك من البشر .
-
البشر بيحسدوا وبيحقدوا والعياذ بالله .
* هسه عندك زي ناس المريخ ديل حاسدننا حتى في لقب سيد البلد .
- والله صحي .
-
أول مرة في حياتي أشوف لي زول بيحسدوه في (لقبو) .
-
هسه أنتو لقبكم (ضل البلد) في زول حسدكم ؟
-
لقبكم (المدفور) في زول حسدكم ؟
-
لقبكم (صحبة راكب) في زول حسدكم ؟
-
بالعكس بنتمنى ليكم كل خير .
-
شدة ما بنتمنى ليكم الخير كل سنة بنسوقكم معانا دوري الأبطال (صحبة راكب) أو (هوادة ساكت) .
-
وبمناسبة الهوادة .
-
المريخ لعب أمس الأول، أمام شندي وكان فاكروا الأهلي المصري .
-
الجماعة ديل حتى في العثرات بقلدوا الهلال .
-
إحنا اتعادلنا مع (الأهلي) المصري وودعنا البطولة، جوا هم بدون مقدمات خسروا أمام (الأهلي) شندي .
-
ده أهلي شندي كده .. أهلى مصر كيف ؟
-
غايتو السنة دي بالذات يا متنا من الضحك ويا كمان الضحك كتلنا .
-
والمريخ بطريقتو دي الوصافة ما بلم فيها .
-
كومر وطبنجة ونمر ديل ما بأكلوكم عيش والله .
-
القصة دي صعبة عليكم .
-
وحالتو أهلي شندي (بعافية شوية) .
-
أهلي شندي خسر من هلال الفاشر بشندي .
-
ولكنه فاز على المريخ .
-
واضح إنو المريخ اتخلع من اسم (الأهلي) .
-
البخلعكم شنو يا أولاد الحلال؟
-
كان للأهلي المصري ده أنتو بتشوفوا في (بن اسبورت) فقط .
-
ما بتصلوا مرحلة تقابلوا الأهلي .
-
لأنو زي ما قالوا الأهلي المصري ببدأ اللعب في الأبطال بعد طيران المريخ .
-
أنتو والأهلي المصري زي (قضيب السكة حديد) .
-
وغايتو الله يكفينا شر (المصدي) اللمعتو الأيام .
-
ونركب صافنات ونجيبه (جعلية) وأصلو الزول بيموت والذكرى تفضل حية .
-
و..و..
* وصفوفنا ليه صفين؟