* توفى (رب الأسرة) بسبب وباء يشبه (حمى الكنكشة) ، وقد أصاب الأسرة حزن كبير بسبب رحيل ركيزة البيت ..
* وقد تداعى الأهل والمعارف والاصدقاء لبيت العزاء ..
* وكان (الفراش) يومين ..
*وقبل (رفع الفراش) توفي أحد أبناء الأسرة بذات الوباء ..
* فتم تمديد (الفراش) بذات الصيوان والكراسي والصبارة ..
* واستمر (الفراش) يومين أيضاً..
* وفي اليوم الثاني توفيت (ربة الأسرة) بذات الوباء ..
* وتم تمديد (الفراش) بذات الصيوان والكراسي والصبارة ..
* فكان (الفراش) يومين كذلك ..
* وفي اليوم الثاني توفى إبن خالهم (معاهم في البيت) توفى بذات المرض فتم تمديد (الفراش) بذات الكراسي والصيوان والصبارة ..
* وهكذا.. يموت زول بذات الوباء قبل رفع (الفراش) فيتواصل العزاء بذات الصيوان والكراسي والصبارة ..
* كل يومين يموت شخص من الأسرة بذات الوباء ..
* والدموع انتهت مع الميت الأول والثاني ..
* والذين ماتوا بعد ذلك لم يجد المعزيين دموعاً يبكوهم بها ..
* فاصبح الفراش (صامت) والكل في إنتظار ميت جديد ..
* ولعل هذا بالضبط ما يحدث الآن في المريخ ..
* المريخ بدأ (الفراش) يوم مباراة القمة بالجوهرة الزرقاء (وليد الشعلة) ..
* وقبل ما يرفعوا (الفراش) حدثت ضربة الفاشر فتم تمديد أيام (الفراش) بذات الصيوان والكراسي والصبارة ..
* وفي اليوم الثاني حدثت ضربة أيمن عدار فتم تمديد أيام (الفراش) بذات الصيوان والكراسي والصبارة ..
* وبعد يومين تم رفض الشكوى فتم تمديد (الفراش) بذات الصيوان والكراسي والصبارة ..
* وفي يوم (رفع الفراش) جاء خبر لجنة الاستئناف فتم تمديد (الفراش) بذات الصيوان والكراسي والصبارة ..
* وقبل رفع (فراش) الاستئناف جاء قرار رفض أمير كمال التجديد فتم تمديد (الفراش) بذات الصيوان والكراسي والصبارة ..
* وقبل رفع (فراش) أمير كمال جاء خبر رحيل جمال سالم، والآن فقط يرفع المريخ (الفراش) لاسباب تتعلق بنفاد الدموع ..
* دموعهم انتهت ..
* واحساسهم مات ..
* أكثر من تلاتة أسابيع وهم مكسرين في ذات الصيوان والكراسي والصبارة وشاي الفراش (نصف البارد) ..
* بقي ما عندهم حيل ولا دموع ..
* وجاء الكاردينال هد باقي حيلهم بعملية أطلقنا عليها احنا واولاد حلتنا اسم عملية (نحن في الدمعات غرقنا وانت زي ما حاسي بينا) ..
* الجماعة قبل يومين قالوا (المريخ يفاوض جمال سالم بالتلفون لتواجده في يوغندا) ..
* وامبارح قالوا (المريخ يفقد الاتصال بجمال سالم) ..
* يعني قفل التلفون ..
* يمكن شبكة يا جماعة ..
* يمكن عندو شريحتين في تلفون واحد ..
* يكون لما اتصلتو عليهو في شريحة (1) كان بيتكلم مع الكاردينال بالشريحة (2) ..
* احتمال بطاريتو كعبة ..
* الحقيقة أن جمال سالم (كسر حنك المريخ وكسر الشريحة ودخل قاردن سيتي) ..
* غير الرقم والجماعة لسه مصرين يتصلوا ..
* شافوهو في بيت الكاردينال قالوا ده (فتشوب) ..
* فتشوب ب(الغاء) ..
* ناس المريخ صور ساكت بقوا حافظين لون بوماستك بيت الكاردينال وشكل الكراسي ..
* في واحد قال لي الكراسي الفي بيت الكاردينال دي اتغيرت ..
* قلت ليهو كيف ؟
* قال لي شيبوب لما اتصور مع الكاردينال في قاردن سيتي شكل الكراسي كان (بيضاوي) ، وهسه صورة جمال سالم مع الكاردينال في كراسي شكلها (منقوش) ..
* قلت ليهو طيب قدموا شكوى في الكراسي ..
* خلوا أيمن عدار يكتب ليكم شكوى علي أساس إنو الكراسي ما ياها ..
* الكاردينال صعب ..
* وحالتو ما لابس كسكتة ..
* الكاردينال قعد مع جمال سالم بالعمة والجلابية المكوية ..
* جمال سالم جانا بالبنطلون المشروط في الركبة ..
* قبض الدولار وترك الديار ..
* ليس هنالك شك في أن جمال سالم إضافة للهلال ..
* إضافة كبيرة ..
* صحيح أن مكسيم أفضل من جمال سالم ولكن الحقيقة أن جمال أفضل من جمعة ويونس ..
* كده الهلال أمن حراسة المرمى..
* وفي قمة عام زايد الخير سيكون جمال سالم أساسي قبل الكراسي ..
* الضربة حارة ..
* والوجع راقد ..
* والدموع انتهت ..
* و(الفراش) ممتد ..
* قالوا جمال سالم ببيع ..
* ببيع شنو ؟
* يكون ببيع المشاعر و(البصر دون البصائر) ..
* تاني قالوا ح يسحبوا الجنسية ..
* غايتو احنا سجلناهو بجنسيو ..
* دخلنا كشفنا مجنس ..
* بعد كده لو دايرين تسحبوها اسحبوها ..
* ما فارقة ..
* طبعاً ح يعملوا ليك الجنسية موضوع ..
* ح يخدروا الجمهور ..
* أنا عندي سؤال لناس المريخ ..
* سؤال ممكن يكون بايخ حبتين ..
* طيب سؤالي ..
* الكاردينال اخطر بالكسكتة ولا بالعمة ؟؟
* قولوا النصيحة ..
* ما مشكلة ..
* شوفوا أمير كمال ما يكون قفل التلفون ..
* لو قفل التلفون معناها الكلام دخل الحوش ..
* أمير كمال هديتنا للموردة يا كاردينال ..
* وشغل أمير لازم يتم داخل مطعم عوضية سمك ..
* الصور من مطعم عوضية ..
* نعمل تغيير شوية ..
* والله ياخ جمال سالم بالغ ..
* قال ليهم أنا في يوغندا وجا مع الكاردينال من جوبا ..
* وشيبوب برضو جانا عن طريق جوبا ..
* والسماني الصاوي ح يجينا عن طريق جوبا ..
* لكن يا كاردينال محمد الرشيد ما يجينا عن طريق جوبا ..
* محمد الرشيد جيبو عن طريق ملكال ..
* وتبكو بس .. عين قطرة وعين مس ..
* أمبارح (الصبحية) كانت بنزار والثعلب، والسهرة كانت بجمال سالم ..
* وغايتو السنة دي بالذات يا متنا من الضحك ويا كمان الضحك كتلنا ..
* ونركب صافنات ونجيبة (رباطابية) واصلو الزول بيموت والذكرى تفضل حية ..
* و..و…
* ونحن في (الدمعات) غرقنا و……..(انتو تضربوا في البيتزا) ..