- أول ما قالوا (الكورونا دخلت السودان) أنا طوالي جريت للصحف السياسية.
- أي صحيفة سياسية في البلد دي قريتها من (الألف للياء) .
- قلت ألقى تصريح للسيد الصادق المهدي .
- أصلو السيد الصادق المهدي كل ما تكون في حاجة جديدة بيصرح.
- قريت الصحف السياسية واتوقعت الصادق المهدي يقول لينا (الكورونا دي زي دخان المرقة) .
- اتوقعتو يقول : (الكورونا ما وجع ولادة) .
- لكن ما قال .
- غريبة والله .
- الكورونا منتشرة في العالم والصادق المهدي ساكت ما أتكلم .
- شكلو الإمام ح يباغتنا بتصريح يطلب فيه انتخابات مبكرة بسبب الكورونا.
- وغايتو جنس غايتو .
- لا أعتقد أن المهاجم العراقي عماد محسن من (المواسير) .
- صحيح هو ليس من نوعية ساماتا ولكنه مهاجم جيد .
- أكثر ما كان يحتاجه عماد المشاركة والصبر .
- العراقي ما كعب والله .
- يفترض نتيح له الفرصة حتى يثبت وجوده وينسجم ثم ننتظر منه التألق في الموسم الجديد .
- عماد اتململ من (الكنبة)، وأحسب أن الكاردينال نجح في مخططه الذي قصد من خلاله إجبار العراقي على الرحيل .
- ختوهو في الكنبة (عن قصد) فطلب هو فسخ العقد بالتراضي .
- لا أقول أن الهلال سيندم على عماد ولكن أقول لن يأتي محترف بقامة الأزرق في وجود الكاردينال .
- حاجة تكسف.
- بعد أيام سوداء تلاشى صف البنزين فهل هذه العدوى الحميدة تنتقل للرغيف ؟
- صف الرغيف أطول من يوم الحزن .
- البنزين مسموح ليك بي (١٢٠) جنيه ، والرغيف مسموح ليك بي (٣٠) جنيه .
- وهذه معادلة مظبوطة (شح في الحركة يوازيه شح في الشبع) .
- وأي كوز ندوسو دوس .
- الكل في الهلال يخاف على عبد الرءوف من الإعلام والغزل .
- ولكن عبد الرؤوف (أبرد) من أن تحركه مانشيتات الصحف والكلام المعسول .
- لا تخافوا عليه بل قولوا ماشاء الله كلما جات سيرتو .
- ونتمنى أن يصنع عبد الرؤوف الحدث مع منتخبنا الوطني .
- المنتخب بحاجة لصانع ألعاب بقامة وقيمة عبد الرءوف .
- داير التش يمسخ ليك شوف عبد الرءوف .
- ولو داير كرة القدم تطلع من نفسك شوف صلاح نمر .
- وكمان لو داير تحمد الله على نعمة الهلال اتذكر إنو المريخ تلاتة سنين على التوالي بيطير من التمهيدي .
- وتبكوا بس .. عين قطرة وعين مس .
- الوزير القال : (قدرنا على البشير معقولة ما نقدر على الكورونا الصغيرة دي) الوزير ده بالذات يفترض يوزع لينا كمامات مجانا .
- كل دول العالم وزعت الكمامات مجانا لمواطنيها ما عدا السودان .
- هنا الكمامة بقت أغلى من (بطانية النمر) .
- أغلى من (الناموسية) ..
- الكورونا لو عرفت أسعار كماماتنا ما بتجي والله .
- الظريفة الواحد بقى يلبس كمامتو ويطلع على الظلط .
- يطلع ويتلفت شمال يمين.
- منتظر الكورونا .
- غايتو أمبارح بالليل تلاتة من أولاد حلتنا لبسوا الكمامات وكل واحد شايل ليهو عكاز ومشوا على الظلط .
- يا خوانا الكورونا (مرض) ما (حرامي) .
- اللذيذة كنا في صالة العرس كل زول بعاين للتاني .
- العريس بعاين للعروس بطرف عينو وام العروس بتعاين لخالة العريس بطرف عينها .
- وكل زول خايف من التاني .
- ما في زول برقص .
- ولا في زول ببشر.
- حتى كلمة مبروك دي بقولها ليك من بعيد .
- والعروس حالفة ما تلبس كمامة مع الزفاف.
- والعريس حالف العروس تلبس .
- ونحن حلفنا ما نشيل العريس على الأعناق.
- والفنان يشيل ويغني (منو الهسه غيرك مصابك سميرك) .
- وصحن الكوكتيل زي ما هو .
- ما في زول هبشو.
- قطعة الفرخة ، والزيتونة، وقطعة البيتزا والطعمية وقطعة الباسطة.
- غلبنا نأكل والله .
- الصحون رجعت زي ما هي .
- كان عندنا إحساس إنو الكورونا معلقة في (زينة الصالة والمكيفات الباردة) .
- الحفلة كلها قضيناها بنعاين للنجف الفي سقف الصالة .
- خفنا تقع فينا كورونا بالغلط.
- وأنا والله أكتر حاجة وجعتني (كراع الفرخة الخليتها في نص الصحن ومشيت) .
- والعجب قطعة الكفتة.
- اعاين للكفتة وانعل في اليوم العرفت فيهو الصين .
- وغايتو جنس غايتو .
- ونركب صافنات ونجيبة (صيدلانية) واصلو الزول بيموت والذكرى تفضل حية .
- و..و..
- وفي الطيف أو في الصحيان زورني يا حبيبي أنا………..( ما بطلع ليك بدون كمامة) .
The post محمد الطيب الأمين: أعاين للكفتة وأنعل اليوم العرفت فيهو الصين!! appeared first on باج نيوز.