السودان: حسين خوجلي يكتب: عامية بيت البكا
من كرامات بيوت العزاء والأفراح السودانية غير المواساة والمشاركة والمساهمة والتسرية، يظل الانتباه لتعليقات الجوار في الخيمة والمناضد والكراسي مدخلاً معرفياً لإلتقاط الواقع السياسي والاقتصادي والاجتماعي وكل أذن حصيفة منتبهة يمكن أن تلتقط حزمة من العناوين التي تصلح لإصدار أكثر من صحيفة. وعلى طريقة تدريب البواكير في العمل الإعلامي ظللت ألتقط مجموعة من العناوين من خيمة العزاء الامدرماني دون أن ألفت انتباه الاخرين إلى أنني اسجل ملاحظاتهم وتعليقاتهم الساخرة الساحرة، فإليك عزيزي القارئ هذه المجموعة من العناوين والتي يمكن أن تتطور إلى مقالات ودعوات للنقاش والتي تصلح للتدبر وحتى الحلول.
1- أنت عارف يا ود بانقا الوباء ده لو جانا في السودان مابيقيف على كرونا ، ده ببقى كرونا وكرولا وكريسيدا وكامري.
2- يا جماعة والله السعودية دي شايلة معانا التقيلة ولذلك إن أحسنت تستحق الثناء وإن قصرت تستاهل الصمت الكريم رغم إني متأكد إنو حاشاها من التقصير، فرد عليه أحدهم: إنت يا كرار ماك ضايق خيرها فرد عليه بصوت صاخب وغاضب: كلكم ضايقين خيرها.. الخزانة مسحت الشوارب والحجر الأسعد مسح الذنوب.
3- كدي ألفتو لي أحمد الانصاري ده .. عندي معاهو كلمة (أنا شايف يا أحمد إنو الشيوعيين والبعثيين شالوا نوار الخدمة المدنية. إن شاء الله سيدك ما مرقنا بي قد القفة؟
4- سمعت قالوا ضياء السوداني قال يحجزوا جوازات الوزراء الأجانب ديل .. والله ليهو حق .. كلنا خايفين كان الكوع حمي يقوموا صوف.
5- الأزمات في زمن البشير كانت عترة بتصلح المشية اليومين ديل بقت نكتة بتصلح الحكي. أنا نفسي أبدأ بالهتاف المعروف (إستقيل ياثقيل) لكن بصراحة الثقلاء بقوا كتار، وده معناهو دمي بتفرق بين القبائل.
6- نمرة الدولار زمان كانت 11خ/ هسة بقت111 خ/ت على وزن قحت التي أصبحت قحط .
7- ود سعيد يعقوب عافي منو بقى الطفل المعجزة. وكيل أول ومدير عام وناطق رسمي وتمكيني وعضو لجنة مركزية وسفير وراجل سفيرة وسوداني وفرنساوي.
8- إت يا أدروب الشرق بقى كيف؟ أجاب بطريقة الشرقاوي البليغ بورتسودان كانت سفينة لمساكين بالبحر ويا إبراهيم أخوي ما إنت عارف الحالة بقت القعدة في قضروف سعد ملاله! أما كسلا أصبح الغاز والطوابين صرعى والكوانين بتن في اطراق!
9- نحن في زمان أصبحت فيه الرغيفة قطعة زلابية وأصبحت الزلابية حبة بليلة والشاطر يكمل المنظومة!!
10- سمعت قبل أسبوع من ثقة إنو مجموعة الضباط المحالين للمعاش وصلوا 400 إنت يا الطاهر الجيش ده فيهو كم ضابط؟
11- إنت القحاتة ديل كان ما لقو ليهم فنان وأناشيد بنات ناس ما يشغلوا أناشيد مايو الأولى:
يا فارسنا ويا حارسنا .. يا بيتنا ومدارسنا.
كنا زمن نفتش ليك جيتنا الليلة كايسنا!
هم قايلين بيلقوا أحسن من حمدوك ده؟ الراجل ولدهم وتربية إيدهم!
12- يا جماعة الخير إنتو ود عباس مدني ده عفيناهو من الصفوف سوا لينا شنو في الواحد وعشرين يوم؟؟
13- بتي شاهيناز السنة دي ماشة الروضة قمت حفظتها عشرة من قصار السور قامت أختها الكبيرة قالت ليها أوعك .. القراي بجلدك!
14- إنت الجماعة ديل كان مالاقين حل لعشة وأسماء أخير يدوهم إمتياز المعاش قبال يجي الرشاش.
15- البارح يا دقلاشي سمعت آخر روائع سامي صولة .. وحفظت المقطع الأول:
ممشوقة زي طاولة رغيف
ومزدانة بالفول النضيف
وزي بوش مظبط من حريف
لو حافلة الحظ الوريف
شالتني بالوعد الشريف
كنت غنيت للسيادي
وهتفت للقصر المنيف!
16- بصراحة يا السر البلد واقفة، فرد إبراهيم المو بطريقته اللاذعة واقفة بت القبايل دي! دي مهرولة صوب الهاوية يا مثالي.
17- تعرف أخطر مافي سد النهضة لما تغرق الخرطوم أديس أبابا بتكون مستمتعة بآخر نسخة من التايتنك!
18- أما ألطف ما قيل في بيت العزاء فكانت الموعظة الدرامية الآتية لمولانا عثمان المنا:
حيث قال عارفين يا جماعة إنو الدكتور محمد يوسف مصطفى ده، والده يوسف مصطفى عقد في صراصر بالشريعة، وسموه محمد خير الأسماء بالشريعة، وعملوا السماية (العقيقة) بالشريعة، وختنوه بالشريعة وحفظ جزء عم في خلوة صراصر بالشريعة، وعرسو ليهو بت شيخ الأمين محمد الأمين بالشريعة وولد أولاده وبناتو بالشريعة وعرس ليهم بالشريعة. بقى شيوعي وإحتمل أهل صراصر شيوعيته بالشريعة (لَا إِكْرَاهَ فِي الدِّينِ) وعفا السودانيون خيانته الوطنية وإلتحاقه بالمتمردين يالشريعة (قُلْ يَا عِبَادِيَ الَّذِينَ أَسْرَفُوا عَلَىٰ أَنفُسِهِمْ لَا تَقْنَطُوا مِن رَّحْمَةِ اللَّهِ ۚ إِنَّ اللَّهَ يَغْفِرُ الذُّنُوبَ جَمِيعًا ۚ إِنَّهُ هُوَ الْغَفُورُ الرَّحِيمُ) وعينه البشير وزيراً وفاء للعقود بالشريعة، وعاد للجامعة أستاذاً وفاءً للعدالة وتكافؤ الفرص بالشريعة، وبعد عمر طويل فإن تلقينه الشهادة وغسله وتكفينه والصلاة عليه ودفنه وتقسيم ورثته سيكون وفقاً للشريعة، وهذا يؤكد أن الدين (موجود) في كل تفاصيل حياة محمد يوسف غير أن هذا لا ينفي أن عقل الدكتور غير موجود!
حسين خوجلي
The post السودان: حسين خوجلي يكتب: عامية بيت البكا appeared first on الانتباهة أون لاين.