![](https://i0.wp.com/bajnews.net/wp-content/uploads/2018/03/1464053_179212605617402_1380398551_n.jpg?resize=300%2C356&ssl=1)
* قبل (15) سنة، تقريباً كانت الفتاة لا تخرج من منزلهم إلا ومعها (محرم شرعي).
* وفي الغالب بيكون (أخوها الصغير).
* الفتاة عندما تواعد حبيبها تأتي وتقابله ومعاها شقيقها الصغير.
* هي بتكون قالت لناس البيت أنا ماشة لصحبتي أجيب لي كتاب.
* طوالي ناس البيت بيقولوا ليها: (سوقي معاك حمودي).
* وتجيك ومعاها حمودي.
* لا تعرف تتونس معاها ولا تعرف تجاوب على أسئلة حمودي الفارغة جداً.
* في عز الونسة يقول ليك : يا عمو الطيارة دي بتطير كيف؟
* وعلي فكرة النوع البيسأل ده أخير من النوع البيطلب.
* في نوع من الأطفال البيجونا مع أخواتهم كل ما يشوف حاجة يقول ليك عايزها.
* لو شاف باسطة يقول ليك أنا داير باسطة، شاف بطيخة يقول ليك اشتريها لي، شاف حلاوة مولد يقول ليك اشتريها لي.
* الشافع يتمنى فيك.
* يطير ليك (الخلطة) من رأسك.
* مرة بتذكر جاتنا واحدة ومعاها أخوها الصغير قام شاف ليهو طاقية كاب قال دايرها قلنا ما مشكلة بسيطة.
* شاف فول حاجات قال دايرو قلنا أوكي.
* شاف حلاوة قطن قلنا خير.
* بعد شويتين شاف ليهو عجلة وحرن قدام المحل وقعد يبكي (عمو اشتري لي العجلة دي).
* يبكي بحرقة أ تقول عندو تار مع العجلة.
* الشافع يبكي ونحن نبكي.
* بكينا لما الله غفر لينا.
* ألم حقيقي.
* وأصلاً إحنا وأولاد حلتنا كنا نتألم غاية الألم عندما تأتي الفتاة (الحبيبة يعني) ومعها شقيقها الأصغر.
* من تشوفها ومعاها أخوها الصغير طوالي بطنك تطم.
* طبعاً الشافع ما عندو ذنب لكن كمان نحن (جيوبنا) ما بتستحمل ده كلو.
* كنا طلاب مساكين.
* وحقيقة كان معانا بعض الأولاد صرفوا صرف تقيل على البنات وأخوانهن.
* صرفوا صرف زول داير (يناسب).
* صرف (نسب عديل).
* النوع البيشتري لأخو البت (عجلة ومسدس موية ولبسة عساكر وموز وبعصرو ليهو الفيها النصيب).
* والنوع ده ضيَّع لينا (حمام كتييييير).
* المهم.
* وبما أن (هذا هو هذا) فإننا وعبر هذه المساحة نطالب الخندقاوي والكوارتي بدعم تسجيلات الهلال.
* بنقول للخندقاوي اشتري لينا عجلة. أقصد بنقول ليهو جيب لينا محترف أجنبي.
* بنقول لكوارتي أهدي لينا مهاجم سوبر.
* الكوارتي والخندقاوي كلاهما دعم الهلال خلال الفترات السابقة.
* دعما وحفزا اللاعبين وكان حضورهما جيد جداً في كثير من المناسبات ..
* نشكرهما على ما قدما وهكذا يكون الهلالي الأصيل.
* ولكن نطلب منهما المزيد.
* نخص (الكوارتي والخندقاوي) لأنهما (علي الصورة الآن)، ولأنهما يرغبان في حكم الهلال مستقبلاً .
* نريد منهما معارضة ذكية وفعالة وعميقة.
* كوارتي يجيب محترف والخندقاوي يجب محترف.
* أصلاً نحن الكاردينال ده في حكاية المحترفين دي قنعنا منو .
* والله صحي.
* بغشنا ساي.
* هو بغشنا والسماسرة بغشوهو.
* عشان كده تاني ما بنصدق إنو ح يجيب لينا محترف (زي الناس).
* الكاردينال داير ليهو محترف ما عندو نادي وعمل (17) عملية جراحية في ركبتو عشان يتعاقد لينا معاهو .
* من زمن ساماتا والأخطر من ساماتا ونحن فاتحين خشمنا للكاردينال وهو بيغش فينا.
* يقول لينا ساماتا ويجيب لينا تيتيه.
* يقول لينا الأخطر من ساماتا ويجيب لينا هارونا.
* حتى أمبومبو الذي (لا بأس به) شرد خلانا وما طيب خاطر.
* في موضوع المحترفين ده ما عندنا ثقة في الكاردينال.
* نتمنى الكوارتي يختار لاعب أفريقي بمواصفات الهلال عن طريق وكيل لاعبين معتمد.
* محترف محترف ما زول أجنبي أجنبي ساكت.
* ونفس الشيء الخندقاوي.
* عشان الموضوع ما يبقى معارضة من أجل المعارضة وفلاشات وصور وكلام كتير.
* مهر الهلال غالي ومن يريد الهلال عليه أن ينكرب.
* داير (يناسب) نادي الهلال يشتري (عجلة) لفريق الكرة.
* الهلال مقبل على مجموعات صعبة جداً ويحتاج لتدعيم في صفوفه.
* وبالأخص خط الظهر.
* الخندقاوي عشان ما يبقي كلام ساي وحوارات وتصريحات يقوم يهدي للهلال مدافع سوبر (ما بنلزمك لكن الهلال بستاهل).
* جيب مدافع متفق عليه واعرضوا على الجهاز الفني ومجلس الإدارة، لو الكاردينال رفض يبقى أنت عداك العيب والعيب في الكاردينال.
* كوارتي برضو عشان الموضوع ما يبقى حوارات وفلاشات جيب لينا لاعب من المريخ (ما بنلزمك لكن الهلال بستاهل).
* أصلاً المريخ قاعد في السهلة.
* فاوض التش أو محمد الرشيد ولو الكاردينال رفض يبقى أنت عداك العيب والعيب في الكاردينال.
* صحيح أن الخندقاوي والكوارتي قدما (السبت) ولكن نطلب منهما (سبت آخر) وبعد داك بيجي (الأحد) إن شاء الله.
* نريد معارضة داعمة وراشدة لا سيما وأن الرئيس الحالي فشل في موضوع فريق الكرة.
* ادعموا الهلال باللاعبين الأجانب الذين يحدثون الفارق وينقلوا الهلال لما هو أفضل.
* لو فعل كوارتي والخندقاوي ذلك سنشكرهما جداً وإذا لم يفعلا برضو ما في مشكلة.
* الهلال حق الجميع وعندما تفشل الإدارة الحالية في ملف الكرة يجب أن نتداعى جميعنا ونجتهد بالفكر والمال في دعم الفريق.
* عشان نشوف الهلال بدون علة.
* ونرجو من الكاردينال أن يتجاوب مع كل داعم ومع كل صاحب مبادرة.
* الهم واحد والهلال للكل.
* ونركب صافنات ونجيبه (هلالابية) وأصلو الزول بيموت والذكرى تفضل حية..
* و..و..
* إيد علي إيد نبني هلال حديد.