* عندما يكون (الوصف) غير دقيق تكتر (المقالب) ..
* لما زول يوصف ليك (بيت ناس) بالشارع الفيهو (باص والي) أو (كلبة والدة) فهذا شروع في (التوهان) ..
* ح تروح يعني ح تروح ..
* يقول ليك : (الشارع الأول خليهو ، في الشارع التاني بتلقي (باص والي) واقف ..
* طيب أها لو باص الوالي ده إتحرك قبل ما أنا أجي ؟؟
* وفي نوع تاني بيقول ليك : (الشارع الرابع من المدرسة في كلبة والدة وجمبها سبيل) ..
* طيب أها لو أنا مشيت ولقيت (الكلبة دي تمت الأربعين) ؟؟
* وصف غريب ..
* الوصف الزي ده ممكن يدخلك في حرج بالغ ..
* ممكن تمشي (تعزي ناس في بكا غير البكا الأنت جاي ليهو) ..
* أو ممكن تلقي (صيوانيين أتنين) في الحلة ، تقوم تمشي تشيل (الفاتحة) لناس عندهم (سماية) ..
* وحاجات زي دي حصلت كتيييير ..
* تلقى الزول جاي بيت بكا ويقوم في نفس الحلة يلقي ليهو ناس عندهم سماية أو (طهور) ويقوم يخش فيهم شمال ويشيل الفاتحة من طرف ..
* موقفك بيكون بايخ جدا ..
* وبما أن ذلك كذلك فأن أهل المريخ قد قرروا الذهاب بشكواهم إلي (لوزان) ..
* قالوا ماشين لوزان ..
* الخوف ما يعرفوا الطريق ..
* يبقوا زي الزول الشال فاتحة لناس السماية عن طريق الغلط ..
* أخشى والله أن يقدم المريخ (شكواه) للكونغرس الأمريكي بدلا عن (لوزان) ..
* ناس المريخ ح يروحوا لو مشوا لوزان ..
* والله صحي ..
* ديل الشكوى في الفاشر كتبوها غلط ..
* زول في الفاشر بيشتكي غلط ، قطع شك ما بيعرفوا درب لوزان ..
* أنا خايف يمشوا (جامعة الدول العربية) يكونوا فاكرنها لوزان ..
* البكتب شكوى غلط مستحيل يعرف درب المحاكم ..
* امشوا لوزان لكن أعملوا حسابكم ما (تروحوا) وتقوموا تدخلوا جامعة الدول العربية بالغلط ..
* وغايتو السنة دي بالذات يا متنا من الضحك ويا كمان الضحك كلتنا ..
* من الخطأ أن يسرح الهلال لاعبيه بينما مباراة كأس السوبر متبقي لها (17) يوم فقط ..
* صحيح إن نجوم الهلال يعانون من إرهاق شديد بعد موسم شاق وضاغط ولكن طالما هنالك مباراة فلا راحة إلا بعدها ..
* كأس السوبر بالامارات هو حدث كبير وسيكون عليه ضو إعلامي أكبر ولذلك لابد أن يستعد الهلال بشكل جيد حتى يحقق الكأس ويقدم مباراة تليق باسمه ومكانته المعروفة عند العرب ..
* ننصح الجهاز الفني الهلالي بأن يكتفى بالأيام الماضية (راحة) على أن يبدأ الهلال العمل وبجدية إستعدادا للسوبر ..
* دي مباراة ح تظل مسجلة على صفحات التاريخ ..
* وأى حاجة عندها علاقة بالتاريخ لابد أن تكون من نصيب الهلال ..
* الحاجات المشرفة من نصيب الهلال ..
* والحاجات الما مشرفة زي (شيل الكورة وزيكو) من نصيب المريخ ..
* المهم ..
* علينا أن نرفع شعار التحدي ونجتهد في تحضير الفريق حتى يحقق الكأس ..
* الفائز في مباراة السوبر سيحصل على (200) ألف دولار ..
* والـ(200) ألف دولار بتجيه أمور الهلال وبتظبط التسجيلات وبتوفر حق المعسكر ..
* نعم التسجيلات تنطلق قبل السوبر ..
* لكن ممكن (ندين عليها عديل) ..
* (200) ألف دولار بتعادل حوالي (9) مليار جنيه سوداني ..
* (9) مليار ممكن ندي منها الثعلب ونزار والشغيل وأبوعاقلة ..
* مبلغ محترم في هذا الزمن ..
* يبقى الإهتمام بهذه المباراة التاريخية أمر واجب ..
* مجلس الإدارة بقيادة الكاردينال عليه أيضا أن يشرف على الإعداد بنفسه وأن يشعر اللاعبين باهمية المباراة ..
* وبإذن الله سيكون الكأس من نصيبنا وسيكون الدولار من نصيبنا وستكون التسجيلات من نصيبنا ..
* لكن الخوف بعد ما نشيل الكأس يقوم المريخ يشتكي ..
* ديل بعملوها ..
* ممكن يشتكوا في أي حاجة ..
* لو لقوا (النجيلة) سمحة في الأمارات ممكن يشتكوا ..
* يقول ليك النجيلة سمحة وما ساعدتنا على الأداء ..
* طبعا هم متعودين على نجيلة إستادهم ..
* متعودين على نجيلتهم العاملة زي (وش البت الما نفع معاها الكريم) ..
* المهم ..
* التسجيلات على الأبواب والمريخ ممنوع من التسجيل ..
* ممنوع بأمر (الفيفا) ..
* وعندهم خمسة لاعبين عقوداتهم منتهية ..
* الخمسة هم : ( جمال سالم ، التاج أبراهيم ، النعسان ، أمير كمال وضفر) ..
* طبعا للأسف الشديد ديل كلهم ما عندهم طريقة يجوا الهلال ..
* ما عندهم خانات في الهلال حاليا ..
* لكن ممكن الهلال يطلع بدوره التاريخي في (المنطقة) ويقوم بمساعدة هؤلاء اللاعبين ..
* ممكن نسجل التاج إبراهيم في الموردة (هدية من الهلال للموردة) ..
* وممكن نسجل جمال سالم لكوبر (هدية من الهلال لكوبر) ..
* وأصلا النعسان قالوا ناس الشرطة القضارف دايرينو ..
* أما الأخ أمير كمال والأخ ضفر فعليهما أن ينتظران المريخ في التسجيلات القادمة ..
* ما تستعجلوا يا أمير ..
* الصبر سمح ..
* الغريبة صلاح نمر ما فاكي ..
* صلاح نمر عقدو ما منتهي ..
* حاجة غريبة والله ..
* يعني نمر ح يمشي الأمارات ..
* ح يشارك في السوبر ..
* ده خبر سعيدا جدا جدا ..
* في مباريات القمة بالنسبة للهلال وجود صلاح نمر اهم من وجود الصادق شلش ..
* نمر مثله ومثل وليد الشعلة مهم جدا ..
* لو نمر ما سافر معناها الهلال ح يلعب ناقص ..
* نمر لازم يكون أساسي قبل الكراسي ..
* وغايتو الله يكفينا شر (المُصدي) اللمعتو الأيام ..
* ونركب صافنات ونجيبة (موردابية) وأصلو الزول بيموت والذكرى تفضل حية ..
* و..و..
* وإذا الخاطر سرح عنك تأكد إنو راح …..(السنغال) ..
https://www.bajnews.net/news/38409